Littira allu Patritiernu (Mastro Bruno Pelaggi)

Littira allu Patritiernu 

(di Mastro Bruno Pelaggi)

Non vidi, o Patritiernu,

lu mundu ‘mu sdarrupi

ch’è abitatu di lupi

e piscicani?

Priestu, mina li mani,

vidi cuomu ‘mu fai,

cacciandi di ‘sti guai,

manneja aguannu!

Non vidi can di fannu

muriri a puocu a puoco?

Tu ti mintisti juocu

e stai ‘mu guardi?

Si vue ‘mu li ‘mbumbardi

non vue l’artiglieria,

ca dici: “Chistu sia!”

e tutt’è fattu.

Ti priegu, cu ‘nnu pattu:

‘mu fai la generali,

ca la particulari

già l’avimu.

Fa ‘guali lu distinu,

ca ‘guali ndi criasti

e ‘guali hai ‘mu ndi guasti,

cuom’è giustu.

Non ‘mu ndi duni gustu

‘mu ndi dassi a corcunu,

ca pue cu Mastru Brunu

hai chi ‘mmu scardi!

Si vue m’usi riguardi

miegghiu ‘mu dassi stari

e dassandi mangiari

di ‘sti lupi.

Cchiù ca simu futtuti

essiri non putimu,

fuss’armenu m’aviamu

pani asciuttu!

Li previti hannu tuttu,

è china la dispensa

li ricchi, vannu a mensa

e nnui ‘nu cazzu!

Io mo’ pinzai ‘mu fazzu

lu stuortu cuttia puru,

ca tu si assai cchiù duru

di ‘nu scuogghiu.

Chiju chi dissi vuogghiu,

‘na grazzia, e nenti chhiùi:

‘mu fai di tutti nui

‘nu funerali:

di Papi e cardinali,

d’Arrè, d’imperaturi,

tutti li supiriuri

cchiù putenti,

e ppue tutti l’aggenti

cchiù ricchi ed avaruni….

vruscianci li cugghiuni

e li dinari!

Pue, sienti c’hai di fari:

lu ‘Mpiernu hai ‘mu lu crisci

ed hai ‘mu lu ‘ngrandisci

‘mu capimu.

Si bbue ‘mu ndi vidimu

scinda pi ‘cchija via

ca jà mi ‘ncuntri a mmia

e ti dicu tuttu,

ca io mi ndi strafuttu,

dicu la vierità –

ca io a Sua Maistà

puru nci scrissi;

‘Sti cuosi nci li dissi

e nnò mi rispundìu

-  povarieju, murìu.

Fu assassinatu

d’unu scelleratu,

di cuori disumanu,

m’ammazza ‘nu suvranu

tantu buonu!

Era arrè galantuomu

e di la patria amanti.

Ti priegu, culli Santi

‘mu lu mienti!

Pì nuatri scuntienti

criasti lu distinu

c’avimu ‘mu patimu

eternamenti.

Tu chi ssi onnipotenti,

giudici di giustizia,

lu cchiù cull’avarizzia

ha’ ‘mu nci pienzi:

hai ‘mu cacci sintienzi

‘mu trema cielu e terra,

hai ‘mu li fai cunserva,

a ‘st’assassini!

Chiova puntuti, spini,

martirii etierni, guai…

Tu, Signuri, lu sai,

non vue ‘mparatu!

Si t’avissi cuntatu

chiju chi fannu a nnui

dirissi: “Assai di chhiùi

s’ammieritannu!”

Speciarmenti chist’annu

chi llu pani va’ ccaru,

lu boja di l’avaru

cuomu ‘ngrassa!

Prima ca l’annu passa

pensaci Tu, Signuri,

ca si nnon li maturi

amari nui!

Io chi ti dicu cchiùi?

A nnui ndi scuorticaru

li previti, l’avaru

e lu Guviernu.

Tu ndi mandi allu ‘Mpiernu?

Ndi fai n’atru piaciri,

nd’arrusti cuom’agghiri

alla gravigghia;

urtima meravigghia

ed unicu ristuoru

per omnia secula

seculoru!!!