Li fimmini culli zzuoccula (Mastro Bruno Pelaggi)

Li fimmini culli zzuoccula 

(di Mastro Bruno Pelaggi)

Non sai quantu mi piacianu

li fimmini culli zzuoccula!

Miegghiu assai di li vruoccula

di rapa!

Speciarmenti cu ‘sapa

‘mu fàcia lu «cri-cro»,

para ca propria mo’

l’aju d’avanti.

Ca preganu li Santi

‘n chiesa, a tutti l’uri,

e pue fannu l’amuri

ad ogni luocu.

- Si fermanu ‘nu puocu

m’arriva la cummari

e parranu d’affari…

tu capisci!...-

Basta, su’ cuosi lisci,

chi tutti ndi vulimu

e tutti ndi facimu

o puocu o assai!

Mo’, si vue ‘mu li sai,

di li mastri zzuocculari,

Tiresa Barillari

è numir’unu…

‘Mu cuntu ad unu ad unu

mi para truoppu forti,

mi pigghia menzanotti

e non la spicciu;

nd’av’arriedu lu Schicciu,

Galeja, San Giluormu…

‘nzomma, tuttu lu jornu

sienti scrusciù!

Nd’ava chi fannu frùsciu…

Na vota catta Rosa

e vittamu carcosa,

quandu catta.

Fujiu cuomu ‘na gatta,

ca si pigghiau di scuornu,

ca catta cu llu journu

e ognunu vitta…

‘Nu culu di marmitta,

gruossu quantu ‘nu pani,

s’argiru li suttani

e cumparìu!

Gridamma nui: «Fi-fiu!»

e fìciamu ‘na fera.

Gridau: «Mala sumera

‘mu vi pigghia!»

Afferrau la manigghia,

si ndi ‘nchianàu supa

e ndi cacciau la scupa

alla finestra.

Cchiù randi fù la festa

ca ficia la difesa!

Statti attenta, Tiresa, non ‘mu cadi

quandu scindi li scali

e niesci juoc’arriedi,

ca nc’è Brunu Michieli

chi st’attientu;

si chiova e tira vientu

e t’irgia li suttani,

t’afferra culli mani,

non sia mai!!!

E s’ava nivi assai

e niesci ‘ntr’alla chiazza,

cadi cuomu ‘na cazza

e ti smindichi!