O chi luci, o chi luci, o chi alligrizza (Mastro Bruno Pelaggi)

O chi luci, o chi luci, o chi alligrizza 

(di Mastro Bruno Pelaggi)

O chi luci, o chi luci, o chi alligrizza,

ca lu scuru lu tagghi cu’ la zzappa!

Cu s’aspittava mai sta cuntintizza

di notti m’è lu suli ntra la chiazza!

Lu Municipiu ndi culau sta pizza:

vintidumila liri pi sta’ cazza…

Ndi ligaru di cuordi lu paisi

e lu puopulu ebreu paga li spisi…

Stu Municipiu, quand’ava dinari,

vo’ mu li spenda prima ca li pigghia:

appena si vindiru abiti e faghi

ficia sta luci ch’è ‘na meravigghia.

Tutta la notti si po’ camminari

(s’attruòppichi, di cca junti tri mijjia)

e, si pi casu, truovi carchi fuossu

cadi ddassutta e ti ruppi carc’uossu.

Stì cunsigghieri stupidi e minchiuni

vurienu currijati cuomu cani

cu’ frischi, cu’ lignati, cu’ bastuni,

cu’ pitrati, ma gruossi mazzacani…

Sapienu ca Nicastru e Muntigliuni

sugnu allu scuru cuomu li pagani.

Mo’ la ficiaru ccani puru annui

mu lucia pi dui siri e nenti cchiui?

La Serra avìa bisuognu di li scarpi

e puoi si l’accattava la scuzzetta,

cà lu viernu ha’ mu passi cu’ li barchi,

cà l’acqua non ava duvi mu si jetta.

Quandu nivica e chiova, cu’ li zzappi

si fannu strati, (e cu parDio l’annetta?)

S’avia furmali l’acqua scindia sutta

e ndi ristava, armenu, nivi asciutta.

Quandu vulienu mu si fannu anuri

facienu ad ogni strata li furmali,

alla Serra s’è chini di duluri:

(la truoppu umidità fa sempi mali)…

si puoi vulienu, sti grandi dutturi,

facienu chidda strata d’Ancinali…

Ormai lu carru firmau alla nchianata

non nci su’ mezzi mu si fa stà strata!

Puoi quand’è l’ura di li votazziuoni

t’abbrazzanu e ti stringianu li mani,

e si cuà ttia non hannu relazziuoni

mentanu mezzi cu’ atri cristiani:

vannu dda chiddi chi nci hai brigazziuoni

a cu’ si dici: no’ pierdi lu pani

Si custrittu mu vai, mu nci lu mienti

e mu fai ca non vidi e ca non sienti!

Vuria mu cantu e no’ mu puosu mai,

cà fatticieddi ndi sapiria tanti;

ma nci vo’ ‘nu volumi gruossu assai

e pi mu scrivu quantu scrissa Danti.

Ma tu ca nci li canti chi ndi fai?

Hannu la testa tosta sti briganti…

Si mbriganu tra iddi e si culeranu,

nescianu a libertà e su’ cuom’eranu.

Jio mo’ non parru cchiù: vuoi no’ cchiù mancu,

cà zzappu all’acqua e simin’allu vientu…

Jio sta canzuni vuria mu la stampu,

ma a stu paisi si perda lu tiempu.

Mo’ già la sira mi ricuojju stancu,

cà vaju mu fatigu allu cummientu.

Sai chi mi resta mu vi dicu sulu?

Ca cuomu cazzi ristamma allu scuru!