Quand’era jiuvinottu (Mastro Bruno Pelaggi)

Quand’era jiuvinottu 

(di Mastro Bruno Pelaggi)

Quand’era jiuvinottu,

jio mi ricuordu appena

ca si dicia ca vena

Cientumasi,

di sira ntra li casi

cu’ certi Carvunari,

pi mu ndi dinnu mali

di Borboni.

Ch’era ‘nu lazzaroni ‘n sigrietu si dicia,

c’ognunu non bulla

mu parra forti,

picchi a sicura morti

jia ‘n cuntru o carciratu

e puoi cadia malatu

e si futtia.

Tandu non capiscia,

però, (mancu li cani!)

cu’ chist’atri suvrani

si dijuna.

‘N Calabria ormai la luna

va sempi alla mancanza…

e non nc’è cchiù spiranza

c’andargimu.

C’arriedi sempi jimu,

li mastri e li fatighi,

chissu lu capiscivi

non di mo’,

cà lu Guviernu vo’

sulu pi mu ndi spogghia

mu ndi leva la vogghia

mu stacimu…

Accussi ndi ndi jimu:

cui pi lu campisantu,

cui cu’ spata ‘nu mantu

e ‘nu sirviettu.

È bieru ca l’assiettu

è difficili assai

di st’Italia c’ormai

la dinnu unita…