Alla luna (Mastro Bruno Pelaggi)

Alla luna 

(di Mastro Bruno Pelaggi)

Povaru Mastru Brunu

quant’appa ‘mu ndi vida

e quant’appa ‘mu grida

fin’a mmò!

Cu’ sapa chi nci vò

‘mu cangirìa furtuna?

Fuorzi chi tu, guè luna

sapirissi

s’in casu volarissi,

datu chi tuttu pue

ca culli giri tue

puru niscimu.

Fuocu quantu patimu!

io sparti mo’ sapìa

ca mancu ‘n casa mia

puozzu muriri?

‘Mu mi ndi puozzu jiri

vurrìa, allumen’appedi,

ca si ‘nccasu adapèdi,

viegnu menu

vurrìa ‘mu sugnu armenu

vicin’a ccu’ mi ciangia

e nnon a ccu’ mi scangia

pi ‘nnu cani.

Vinni m’abuscu pani

e quasi non putenti

ed ammienzu a ‘sta genti

su’ ‘nu stranu;

e si sutta a ‘stu vanu

l’uocchi pi sempi chiudu,

si m’atterranu nudu

è pur’assai!

E di pue, non sia mai!

Sup’a ‘stu cuorpu muortu,

senza mancu cumpuortu

di ‘na cruci,

la notti, quandu luci

tu truovi ardichi e spini

chi cancellanu ‘mpini

a Mastru Brunu.

Non criju ca ‘stu dunu

lu Cielu nci stipau

cuomu ca puru ‘nsurtau

lu Patritiernu!...

Però, picchì lu ‘Mpiernu

pi mmia cumincia prima

e cu’ arrobba e jistima

si la goda?

Su’ pieju di cu’ froda

Sup’a ‘nna martijiata,

chij’anima sciancata

di l’avaru?

Quant’agghiuttivi amaru,

‘ntra ‘st’esistenza mia!

Luna, si non niscìa

quant’era miegghiu!

Ma mo’ chi cazzu pigghiu

ca ti la cuntu a ttia?!

Para ca si sienti a mmia

‘ntra ‘sta nuttata?

Tu, già, non si ‘mparata!...

Cchiù crudeli di chistu?!

Si tti gustasti a Cristu

chi muria!

Io mo’ chi volarìa,

di mia ‘mu sienti pena?

Tu ti guodi la scena

e passi avanti!

‘Ntra ‘stu mundu briganti

chinu di rivuturi,

di chiova, di duluri

e patimenti

tutti l’abbiertimenti

cuntra l’inimicizia

- pilla bona amicizia

e lu pirdunu -

li fannu annui c’ognunu

atru non suspiramu

e, ciangiendu, circamu

fratillanza

di chiji chi lla panza

pòrtanu sempi china,

di chiju chi camina

‘mbastuncinu,

lu riccu signurinu

chi mancu ti saluta

e chi sulu t’aiuta

pimmu muori!

Sacciu si fazzu arruri?

Cu’è c’avarrìa ‘mu ceda,

lu povaru ch’è preda

o lu tirannu?

Iji, chi fannu fannu,

hannu sempi raggiuni,

sfruttanu lu minchiuni

e la ‘gnuranza

(pi’ chissu la crianza

quasi sempi pirdivi

e frustai muorti e vivi

ad unu ad unu!)

Si pue spari a corcunu

la leggi ti ruvina;

però a ccu t’assassina

culla fami

‘nci ràpira li mani

e sparti li pruteggia

- e nnui pi ‘nnu manneggia

simu rei! –

Di ‘mpami e farisei

lu mundu è chinu paru,

ca si mortipricaru

a non finiri…

E putimu durmiri,

non ci nd’è cchiù riparu,

di lu ‘Mpiernu scapparu

li dimuoni.

‘Ntra li puopulazziuoni

si pirdia la cuscienza,

non c’è cchiù pruvvidenza

pi nu’ atri!

Sulu lu Tiernu Patri

sapirìa chi ‘mmu fa.

Io nci lu dissi già

cuomu la pienzu!

Ma tu, cu ‘stu silenziu

chi ‘nzurta pur’a Dio,

vidi lu cuori mio

cuom’è chi ciangia,

e cu’ diverta e mangia,

‘ntra ‘sta bella sirata

e cui fa sirinata

e ccu’ si sciala;

e ccui culla cicala

si menta e cunta guai.

Tu passi… ti ndi vai,

- ti ndi strafutti –

e supa di nui tutti

muta tu t’irgi e ‘nchiani…

lu stiessu fai dimani

e nnui… murimu.