Li giganti di Bregnaturi (Mastro Bruno Pelaggi)

Li giganti di Bregnaturi 

(di Mastro Bruno Pelaggi)

Sai ca si risbigghiàru natra vota

mu fannu li giganti a Bregnaturi?

Cu sa’, scarrandu vittaru ‘ na nota

di chiddi gigantari anticissuri.

Hannu ragiuni ca lu mundu è rota,

cà tuttu càngia ogni vintiquattr’uri…

Ava tant’anni chi non fannu nenti,

mo’ natra vota nci vinnaru a menti.

Aguannu furu fatti belli assai

ch’eranu randi cchiù di ‘na balena

si campa chissu mastru (Non sia mai!)

cunsidiria chi fa l’annu chi bena

Ad ognuno chi ghiu nci dimandai

e tutti mi rispundiru a vuci piena

cà s’ava mali chissu giagantaru

pi Bregnaturi non nc’è cchiù riparu.

Cu nci lu duna natru giagantaru?!

Chi bannu e si lu scippanu ntra l’uortu

mu joca chiddu frazzu a matassaru?

Mu fa si cuosi nci vo ‘n’uomu duottu,

cà quando la cannedda nci appicciaru

lu primu chi partiu fu prupria n’ucchiu.

Puoi tantu ca tirau ca chiddu frazzu

muvir, non mbozza cchiù, mancu pi cazzu.

Lu povaru giganti avia ragiuni

Picchì si vitta ‘n’uocchiu ruvinatu

(all’uocchi lu duluri è forti cchiuni!)

perciò non mossa cchiù lu sbinturatu.

Lu giagantaru paria ‘nu liguni:

tirava forti cuomu dispiratu.

Si lu giganti avia mu mova cchiui

l’uocchi nci li cacciava tutti dui!

Vi ca li bregnaturisi su di geniu,

mu fannu li giganti e la pigghiata,

mo’ fa dui anni nci mandai nu premiu

chi fu na cosa tosta e frischiata.

Pi sti giganti nci vurienu armenu

cincu o siei cuosi tuosti a ‘na sirata.

Basta… Mo viju ‘nu journu di festa

si mi ricuordu, ci mandu ‘na testa…