Mastru Brunu Pelaggi mina li pedi a squatru (Mastro Bruno Pelaggi)

Mastru Brunu Pelaggi mina li pedi a squatru 

(di Mastro Bruno Pelaggi)

Mastru Brunu Pelaggi

mina li pedi a squatru;

iddu vuria la stuoria,

ma nci la caccia ad atru.

Pi tutti ava chi diri

cògghia la genti ntuornu,

però llu cchiù chi parra

pi cu’ non ava scuornu

Lu puopulu minchiuni

chi nuddu lu difenda,

mbeci mu lu ringrazzia

dimustra ca s’affenda…

Ava ragiuni, cazzu,

cu dicia ca ti sbagghi,

si ncasumai alli puorci

nci ghietti li cundragghi!

Rida pi non mu ciangia

supa di lu sirrisi…

chi pi malizzia prubbica

non bala ‘nu turnisi…

La notti dorma puocu,

sempi si leva all’arva,

è di statura picciulu,

ma longa ava la varva.

Si sgrudda di fatiga,

ma non guadagna nenti…

(Si nci siria l’accuordu

di tutta chista genti

Li cuosi cangirienu

e non si suffraria

e forsi alla limuosina

non tantu si ghiria!).

Nci piacianu li vruoccula

e li pastiddi cuotti

e, ancora alla vicchiaia,

nci piacianu li buotti.

Nci piàcia pi mu senta

cantar l’acidduzzièddi

e, cuomu Gesù Cristu,

von beni li zzitieddi

Li pipirieddi, puoi, nci

piacianu abbruscenti,

no’ chiddi tabarani

chi non dicianu nenti,

e mancu chiddi gruossi

tritrola simintusi

c’assumigghianu all’omini

stupidi e prisintusi

Li spiezzi ntra li fimmini

nci piàcianu assai assai:

quandu l’ava di sutta

si sciala quantu mai.

Mo’ vui chi bolarissivu

mu vi ndi dicia cchiui?...

turnati puoidimani

cà nd’ava’n’atri dui…